Bakı, 4 aprel, ARHD.AZ

Böyük Britaniya, Polşa və Şimali Avropa ölkələrinin hakimiyyət orqanları müdafiə ehtiyaclarını maliyyələşdirmək üçün birgə fondun yaradılmasını müzakirə edirlər.

ARHD.AZ xəbər verir ki, bu barədə Avropanın “Politico” nəşrinə iki avropalı diplomat və bir məmur bildirib. Onların fikrincə, əsas ideya silahların daha aşağı qiymətə birgə əldə edilməsi, eləcə də müdafiə ehtiyacları üçün sərfəli kreditlərin alınması imkanlarının yaradılmasıdır.

Avropalı diplomatlar təsdiqləyiblər ki, Böyük Britaniya tərəfi ötən həftə İsveç, Finlandiya, Danimarka, Hollandiya və Polşanın maliyyə orqanlarının nümayəndələri ilə bu ideyanı müzakirə edib. Tərəflərin gələn həftə Varşavada keçiriləcək Aİ maliyyə nazirlərinin görüşü zamanı müzakirələri davam etdirəcəyi gözlənilir.

“Politico” yazır ki, təşəbbüs dövlət borcu az olan, hərbi xərclərə böyük vəsait ayırmağa hazır olan Avropa dövlətləri üçün açıq ola bilər. Bu, Fransa, İtaliya və İspaniya da daxil olmaqla, əksər Cənubi Avropa ölkələrinin iştirakını istisna edir.