Berlin, 10 sentyabr, ARHD.AZ
NATO-nun Baş katibi Polşanın hava məkanının pozulmasına görə Rusiyaya xəbərdarlıq edib
Biz hazırıq, ayıq-sayıqıq və NATO ərazisinin hər qarışını müdafiə edəcəyik.
ARHD.AZ xəbər verir ki, bu barədə NATO-nun Baş katibi Mark Rutte Rusiyaya məxsus dronların Polşa hava məkanını pozması ilə bağlı bəyanatında bildirib.
Hadisə ilə əlaqədar müttəfiq ölkələrin hava hücumundan müdafiə sistemlərinin aktivləşdirildiyini və NATO ərazisinin müdafiəsinin uğurla təmin etdildiyini vurğulayan M.Rutte bu prosesdə Polşanın F-16, Niderlandın F-35, İtaliyanın “AWACS” qırıcıları, NATO-nun çoxfunksiyalı tanker-nəqliyyat vasitələrinin və Almaniyanın “Patriot” sistemlərindən istifadə edildiyini bildirib.
Baş katib hadisə ilə əlaqədar Şimali Atlantika Şurasının iclasında vəziyyətin müzakirə edilərək Polşaya həmrəylik nümayiş olunduğunu, Rusiyanın məsuliyyətsiz davranışının qınandığını qeyd edib. Hadisə ilə bağlı tam qiymətləndirmənin davam etdiyini deyən Baş katib bildirib: “Üzvlər öz müttəfiqlərinin ərazisinin hər qarışını müdafiə etməkdə qətiyyətlidir. Biz şərq cinahımız boyunca vəziyyəti yaxından izləyəcəyik, hava hücumundan müdafiə sistemlərimiz isə daim hazır vəziyyətdə qalacaq”.
Bu hadisənin NATO-nun əhəmiyyətini və Haaqa Sammitində qəbul edilən yol xəritəsinin vacibliyini bir daha təsdiqlədiyini vurğulayan M.Rutte bildirib: “Biz müdafiəyə daha çox sərmayə qoymalı, müdafiə istehsalını artırmalı, çəkindirmə və müdafiə üçün lazım olan vasitələrə malik olmalı və təhlükəsizliyi bizimki ilə sıx bağlı olan Ukraynanı dəstəkləməkdə davam etməliyik”.
Polşanın hava məkanının pozulmasını qəsdən olub-olmamasından asılı olmayaraq, tamamilə məsuliyyətsizlik adlandıran M.Rutte deyib: “Putinə mesajım aydındır: Ukraynadakı müharibəni dayandır. Hazırda əsasən günahsız mülki vətəndaşlara və mülki infrastrukturuna qarşı apardığın bu genişlənən müharibəni dayandır. Müttəfiqlərin hava məkanını pozma. Bil ki, biz hazırıq, ayıq-sayıqıq və NATO ərazisinin hər qarışını müdafiə edəcəyik”.
