London, 22 mart, ARHD.AZ

“Brexit” Britaniya biznesinə illik 37 milyard funt sterlinqə başa gəlir

“Brexit” Böyük Britaniya biznesinə hər il 37 milyard funt sterlinqə başa gəlir.

ARHD.AZ “The Independent”ə istinadla xəbər verir ki, Avropa İttifaqı ilə ticarətdə milyardlarla funt sterlinq dəyərində itkilər Britaniya hökumətini gömrük ittifaqına və vahid bazara yenidən qoşulmaq çağırışları ilə üz-üzə qoyub. Hökumət bildirib ki, Aİ ilə ümumi ticarət həcmi Britaniyanın bloku tərk etməsindən əvvəlki dövrlə müqayisədə 5 faiz azalıb. Parlamentim İcmalar Palatasının kitabxanası tərəfindən aparılan təhlilə əsasən, ticarətdəki 5 faizlik azalma təxminən 37 milyard funt sterlinqə bərabərdir.

Ticarət naziri Duqlas Aleksandr əvvəlki Mühafizəkarlar hökumətinin razılaşdığı “Brexit” sazişini tənqid edərək deyib ki, bu saziş yetərincə effektiv işləmir. Hazırda Leyboristlər Aİ ilə münasibətlərin yenidən qurulması istiqamətində danışıqlar aparırlar.