Bakı, 30 iyun, ARHD.AZ
Hesablama Palatasının nümayəndə heyəti Türkiyədə səfərdədir
Hesablama Palatasının sədri Vüqar Gülməmmədovun rəhbərlik etdiyi nümayəndə heyəti Türkiyə Hesablama Məhkəməsi ilə əməkdaşlıq əlaqələrinin genişləndirilməsi və paralel audit mövzularının müzakirəsi məqsədilə Türkiyənin Qaziantep şəhərində işgüzar səfərdədir.
Hesablama Palatasından ARHD.AZ-a bildirilib ki, səfər çərçivəsində Türkiyə Hesablama Məhkəməsinin sədri Metin Yener və Hesablama Palatasının sədri Vüqar Gülməmmədov iki qurum arasında mövcud əməkdaşlığın daha da gücləndirilməsi istiqamətində görüləcək növbəti addımlar, o cümlədən həyata keçirilməsi planlaşdırılan paralel auditlərin mövzuları, tətbiq ediləcək metodologiya və digər məsələlər barədə müzakirələr aparıblar.
Müzakirələrin yekununda tərəflər 2025–2027-ci illəri əhatə edən fəaliyyət planını və paralel auditlərin həyata keçirilməsi üzrə protokolları imzalayıblar.
Səfər çərçivəsində Hesablama Palatasının nümayəndə heyəti, həmçinin Qaziantep şəhərinin valisi və Qaziantep Böyükşəhər Bələdiyyəsinin sədri ilə görüşlərdə iştirak edib.
