Naxçıvan, 30 iyun, ARHD.AZ

Kəngərlidəki “Çalxanqala IV” əhəng xammalı yatağı hərracda satılıb

İyunun 30-da “Hərracların Təşkili Mərkəzi” publik hüquqi şəxsin inzibati binasında Naxçıvan Muxtar Respublikasının Ekologiya və Təbii Sərvətlər Nazirliyi tərəfindən yer təkinin istifadəyə verilməsi məqsədilə hərrac (auksion) təşkil olunub.

Nazirliyin mətbuat xidmətindən ARHD.AZ-ın bölgə müxbirinə bildirilib ki, hərraca Kəngərli rayonu ərazisində yerləşən “Çalxanqala IV” əhəng xammalı yatağı çıxarılıb.

Ümumi sahəsi 2,2 hektar, ehtiyat həcmi isə 943 min 500 kubmetr olan yatağın auksion üçün başlanğıc qiyməti 94 min 350 manat müəyyən edilib. Hərracın nəticəsinə əsasən, yataq 104 min manat məbləğində yekun qiymətlə satılıb. Qalib şirkətə yataqda mövcud olan əhəng xammalından 5 il müddətinə istifadə hüququ veriləcək. Bununla bağlı zəruri hüquqi və texniki prosedurlara başlanılıb.