Azərbaycan cəmiyyətində sosial dialoqun gücləndirilməsi, əmək hüquqlarının müdafiəsi və vətəndaş rifahının təmin olunması istiqamətində aparıcı rol oynayan Azərbaycan Həmkarlar İttifaqları Konfederasiyası (AHİK) bu gün peşəkar və nüfuzlu bir lider – Sahib Məmmədovun rəhbərliyi ilə fəaliyyətini daha da genişləndirir.
Sahib Məmmədov 1978-ci ildə anadan olub. Təhsildə və idarəetmədə qazandığı uğurlar onun bu gün sosial tərəfdaşlıqlar müstəvisində söz sahibi olmasını təmin edib. O, Kiyev Dövlət Universitetinin Beynəlxalq hüquq fakültəsində magistr təhsili almış, daha sonra Azərbaycan Dövlət İqtisad Universitetində maliyyə və kredit ixtisası üzrə ali təhsilini tamamlamışdır. Eyni zamanda Harvard Biznes Məktəbində menecerlər üçün iqtisadiyyat üzrə proqramı bitirməsi onun beynəlxalq səviyyədə düşünən, strateji baxışlı bir lider olduğunu təsdiqləyir.
Peşəkar fəaliyyətinə 2001-ci ildən başlayan Sahib Məmmədov, müxtəlif beynəlxalq qurumlarda – BMT-nin Miqrasiya Təşkilatı, Avropa Komissiyası və UNHCR-də çalışma təcrübəsinə sahibdir. Bu təcrübələr ona həmkarlar ittifaqları sistemində yeni yanaşmalar və müasir idarəetmə modellərini tətbiq etmək üçün geniş imkanlar yaradıb.
2014-cü ildən etibarən İqtisadiyyat Nazirliyində nazir müavini kimi fəaliyyət göstərmiş və ölkə iqtisadiyyatında mühüm təşəbbüslərin gerçəkləşdirilməsində iştirak etmişdir. 2024-cü ilin avqust ayında Azərbaycan Həmkarlar İttifaqları Konfederasiyasının növbədənkənar VII qurultayında yekdilliklə sədr seçilməsi, onun cəmiyyət və əmək ictimaiyyəti arasında yüksək etimada malik olduğunu sübut edir.
Sahib Məmmədovun rəhbərliyi ilə AHİK-in fəaliyyəti daha çevik, şəffaf və insan mərkəzli bir məcraya yönəlməkdədir. Onun təşəbbüsü ilə həmkarlar ittifaqları yeni əmək mühitinin formalaşdırılmasına, gənclərin hüquqi maarifləndirilməsinə, qadınların əmək bazarında mövqeyinin möhkəmlənməsinə və sosial tərəfdaşlıq mexanizmlərinin inkişafına xüsusi diqqət yetirir.
Əlavə olaraq, Sahib Məmmədov Beynəlxalq Həmkarlar İttifaqları Konfederasiyasının Baş Şurasının vitse-prezidenti seçilmişdir ki, bu da Azərbaycanın həmkarlar ittifaqları hərəkatının beynəlxalq aləmdə mövqeyinin gücləndirilməsi baxımından böyük əhəmiyyət kəsb edir.
Məqsədyönlü, təşəbbüskar və ictimai rifaha bağlı bir şəxsiyyət olan Sahib Məmmədov həm milli, həm də beynəlxalq miqyasda əmək və sosial sahənin inkişafı naminə yorulmadan çalışan, gənc nəslə nümunə olan bir liderdir.
