Laçın, 7 mart, ARHD.AZ
Laçın və Füzulidə daha bir qrup sakin üçün özünüməşğulluq proqramı üzrə kiçik bizneslər yaradılıb
Əmək və Əhalinin Sosial Müdafiəsi Nazirliyinin tabeliyindəki Dövlət Məşğulluq Agentliyi Laçın rayonu və Füzuli şəhərinə köçürülən sakinlərdən daha bir qrup şəxsi özünüməşğulluq proqramı çərçivəsində mal və materiallar formasında aktivlərlə təmin edib.
ARHD.AZ-ın bölgə müxbiri xəbər verir ki, əmək və əhalinin sosial müdafiəsi nazirinin müavini Vüsal Nəsirli özünüməşğulluq proqramı üzrə aktivlərlə təmin olunan sakinlərlə görüşüb. Qeyd edilib ki, proqram iştirakçılarının quracaqları kiçik təsərrüfatlar onların sosial rifahının yaxşılaşmasına töhfə verəcək və bölgədə yeni iş yerlərinin açılmasına imkan yaradacaq.
Proqram iştirakçıları onlara göstərilən dəstəyə görə Prezident İlham Əliyevə təşəkkürlərini ifadə edib, özünüməşğulluq proqramı çərçivəsində qurduqları təsərrüfatlarını daim genişləndirməyə səy göstərəcəklərini bildiriblər.
Qeyd edək ki, verilmiş avadanlıqlar hesabına proqram iştirakçıları un məmulatları istehsalı, dərzi sexi, avtoçilingər, dönərxana və kişi bərbərxanası xidmətləri üzrə kiçik biznes sahələrini yaradıblar.
Böyük Qayıdış Proqramı çərçivəsində doğma yurdlarına qayıdan sakinlərdən özünüməşğulluq proqramı vasitəsilə kiçik təsərrüfatları yaradılan şəxslərin sayı artıq 221-ə çatıb.
