Ankara, 15 aprel, ARHD.AZ
Azərbaycan Şimali Kipr Türk Cümhuriyyətinə (ŞKTC) bütün platformalarda açıq və aydın dəstək nümayiş etdirir. Bu, Şimali Kipr məsələsini həmişə xarici siyasət prioritetlərindən biri hesab edən Bakı ilə Ankara arasında əsl dostluq, qardaşlıq və müttəfiqliyin növbəti təzahürüdür.
ARHD.AZ xəbər verir ki, bu fikri Türkiyənin Uludağ Universitetinin İqtisadiyyat və idarəetmə fakültəsinin professoru Mehmet Yüce ifadə edib.
Onun sözlərinə görə, bu gün Ankara və Bakı qlobal vəziyyətin dəyişməsini nəzərə alaraq beynəlxalq müstəvidə öz fəaliyyətlərini sıx koordinasiya edirlər. “İki qardaş ölkə arasındakı əlaqələr ŞKTC ilə dialoqun inkişafında da özünü göstərir. “Bir millət, üç dövlət” prinsipi bu istiqamətdə atılan yeni addımların əsasını təşkil edir”, -deyə türkiyəli ekspert bildirib.
M.Yüce ŞKTC məsələsini rəsmi Ankaranın siyasətinin “qırmızı xətti” adlandırıb, Türkiyənin Kipr türklərinin qanuni hüquq və mənafelərinin təmin edilməsi məsələsində beynəlxalq ictimaiyyətdən, xüsusilə İslam və türk dövlətlərindən fəal yardım gözlədiyini qeyd edib. O, eyni zamanda, 2022-ci ilin noyabrında Lefkoşanın müşahidəçi ölkə qismində tanınması barədə qərarın qəbul edildiyi Səmərqənddə keçirilən Türk Dövlətləri Təşkilatının (TDT) 9-cu sammitinin nəticələrini “tarixi mərhələ” adlandırıb. Ekspert diqqəti Türkiyənin düşmənlərinin, o cümlədən Avropa İttifaqı ölkələrindən olanların hiylələrinə çəkib və qeyd edib ki, onlar bu məsələdə birləşmiş ərazi birliklərinin ayrı-ayrı ölkələrinə təzyiq göstərməkdə davam edirlər. “Aİ Ankaranın Orta Asiyanın türk dövlətləri ilə münasibətlərinə zərbə vurmağa və birləşmiş ərazi birliklərinin nailiyyətlərinə xələl gətirməyə çalışır. Azərbaycanın bu məsələdə mövqeyi Ankaranın Kiprlə bağlı tezisləri ilə həmrəylik nümunəsidir”, -deyən ekspert Şimali Kiprin TDT-də statusu ilə bağlı qərarın qəbulunda Türkiyə ilə yanaşı Azərbaycanın da mühüm rol oynadığını xatırladıb. O, ŞKTC Prezidenti Ersin Tatarın Azərbaycana səfərini, həmçinin Kipr türklərinin liderinin Şuşada keçirilən TDT-nin qeyri-rəsmi Zirvə toplantısına dəvət edilməsini də diqqətə çatdırıb. Ekspert ötən ili müxtəlif səviyyələrdə, o cümlədən parlamentlərarası müstəvidə təmaslarla bağlı “Şimali Kipr ilə Azərbaycan arasında ən fəal dialoq dövrü” adlandırıb.
“Sevindirici haldır ki, Bakının dialoq və Kipr türklərinə dəstək kursu bu gün də davam edir. Bunu aprelin 9-da ADA Universitetində 80 ekspertin iştirakı ilə keçirilən beynəlxalq forumda Prezident İlham Əliyevin səsləndirdiyi fikirlər də təsdiqləyib”, -deyə M.Yüce qeyd edib. Ekspert, həmçinin aprelin 11-də IV Antalya Diplomatik Forumu çərçivəsində baş tutan Azərbaycan və ŞKTC liderlərinin görüşünü yüksək qiymətləndirib, Ankara, Bakı və Lefkoşa arasında əməkdaşlığın daha da inkişaf edəcəyinə ümidvar olduğunu bildirib.
