Zaqatala, 18 sentyabr, ARHD.AZ

Bu il “Azərtütün”ün emal məntəqələrinə 11,5 min tondan çox yaş tütün verilib

“Azərtütün” ASC ilə müqaviləsi olan respublikanın şimal-qərb rayonlarının tütünçülük təsərrüfatlarında yaş tütün yarpağının yığımı davam edir. Mövsümün əvvəlindən indiyədək cəmiyyətin Balakən, Zaqatala, Qax və Şəki rayonlarında fəaliyyət göstərən tütün istehsalı və emalı məntəqələrinə fermerlərdən 11 min 570 ton yaş tütün daxil olub.

Bu barədə ARHD.AZ-ın bölgə müxbirinə “Azərtütün” ASC-dən məlumat verilib.

Bildirilib ki, builki mövsümdə cəmiyyət tərəfindən Balakən, Zaqatala, Qax, Şəki və Oğuz rayonlarında 868,7 hektar sahədə “Virciniya botaniki” növlü tütün əkilib. Bunun 446 hektarı şirkətin özünə, 422,7 hektarı isə fermerlərə məxsus sahələrdir. Tütün istehsalı ilə əlaqədar 50 fermerlə müqavilə bağlanıb.

Bu günədək emal məntəqələri Şəki rayonu üzrə istehsalçılardan 5636 ton, Zaqatala rayonu üzrə 3090 ton, Qax rayonu üzrə 1791 ton, Balakən rayonu üzrə 882 ton, Oğuz rayonu üzrə isə 171 ton yaş tütün kütləsi qəbul edib. Eyni zamanda, indiyədək emal məntəqələrində yaş tütündən 1459 ton quru tütün istehsal olunaraq anbarlara yığılıb.

Hazırda bu rayonlardakı tütün istehsalı və emalı məntəqələrində, ümumilikdə, 262 tütünqurutma kamerası var. Bu kameraların üstün cəhəti odur ki, yaşıl tütün kütləsi sahələrdən birbaşa məntəqəyə gətirilir və qurudulmaq üçün kameralara qoyulur.