Bakı, 4 aprel, ARHD.AZ
Almaniyanın DAX indeksi ABŞ-ın gömrük siyasəti nəticəsində ən kəskin geriləmə yaşayıb
Almaniyanın aparıcı fond indekslərindən olan DAX həftə ərzində 8 faizədək geriləyərək, son illərin ən kəskin azalmalarından birini yaşayıb. Təkcə bu gün ərzində DAX 4,9 faiz geriləyib.
ARHD.AZ yerli mediaya istinadla xəbər verir ki, Almaniya birjası üçün 2022-ci ildən bəri ən böyük həftəlik itki hesab olunan bu geriləmə ABŞ Prezidenti Donald Trampın gömrük siyasəti və Çinin buna cavab tədbirləri nəticəsində baş verib. Çin ABŞ-dan idxal olunan məhsullara 34 faiz əlavə gömrük rüsumu tətbiq edəcəyini açıqladıqdan sonra investorlar kütləvi şəkildə səhmlərini satmağa başlayıblar.
ABŞ birjalarında da geriləmələr müşahidə olunub. “Dow Jones” indeksi 2,7 faiz, “S&P 500” isə 3,1 faiz dəyər itirib. Xüsusilə texnologiya sektoru ciddi zərər görüb, Nasdaq indeksi 3,5 faiz azalıb. İnvestorlar ticarət müharibəsinin dünya iqtisadiyyatına mənfi təsir edəcəyindən narahatdırlar. Almaniya avtomobil sənayesi də proseslərdən təsirlənib. “Mercedes-Benz” Sindelfingendəki zavoduna yüz milyonlarla avro həcmində investisiya yatıracağını açıqlasa da, fond bazarındakı dalğalanmalar şirkətin səhmlərinə mənfi təsir göstərib.
Qeyd edək ki, Almaniyanın aparıcı fond indeksi olan DAX (Deutscher Aktienindex) Frankfurt Birjasında təmsil olunan ən böyük 40 şirkətin səhmlərini əhatə edir. O, Almaniya iqtisadiyyatının ümumi vəziyyətini əks etdirən əsas göstəricilərdən biri hesab olunur.
