Bakı, 3 mart, ARHD.AZ

Rumıniya dövlət katibinin müavini: Azərbaycanda etnik, dini və irqi zəmində heç bir qarşıdurmanın olmaması müsbət haldır

Dini Qurumlarla İş üzrə Dövlət Komitəsinin sədri Ramin Məmmədovun rəhbərlik etdiyi nümayəndə heyəti martın 3-də Rumıniyanın Dini məsələlər üzrə dövlət katibinin millətlərarası münasibətlər üzrə müavini Dincer Geafer ilə görüşüb.

Komitədən ARHD.AZ-a bildirilib ki, Dövlət katibinin müavini Rumıniyada milli və dini azlıqların fəaliyyəti, bu istiqamətdə görülən işlər barədə ətraflı məlumat verib. Azərbaycanın cəmiyyətdəki etnik-mədəni müxtəlifliklərin tənzimlənməsi sahəsində əldə etdiyi nailiyyətlərə diqqət çəkən D.Geafer ölkəmizdə etnik, dini və irqi zəmində heç bir qarşıdurmanın, münaqişənin olmamasını müsbət hal kimi dəyərləndirib.

Prezidenti İlham Əliyevin rəhbərliyi ilə respublikamızda tolerantlıq ənənələrinin inkişaf etdirildiyini vurğulayan Ramin Məmmədov ölkəmizdəki etnik-dini müxtəliflik haqqında məlumat verib, fərqli konfessiyaların və xalqların dinc yanaşı yaşamasının Azərbaycanda uğurlu dövlət-din münasibətləri modelinin göstəricisi olduğunu bildirib. Komitə sədri, həmçinin ölkəmizin mədəniyyətlər və dinlər arasında dialoqun dərinləşməsinə xidmət edən qlobal təşəbbüslərlə çıxış etdiyini deyib.

Sonra tərəflər əməkdaşlığın inkişafı ilə bağlı məsələlər ətrafında müzakirə aparıblar.