Xankəndi, 26 fevral, ARHD.AZ
Xankəndidə Xocalı soyqırımının 33-cü ildönümü ilə əlaqədar anım tədbiri keçirilib
Xankəndi şəhərində, Ağdərə və Xocalı rayonlarında Azərbaycan Respublikası Prezidentinin xüsusi nümayəndəliyi və Qarabağ Universitetinin birgə təşkilatçılığı ilə Xocalı soyqırımının 33-cü ildönümü ilə əlaqədar anım tədbiri keçirilib.
ARHD.AZ -ın bölgə müxbiri xəbər verir ki, əvvəlcə Azərbaycanın Dövlət Himni səsləndirilib, şəhidlərin xatirəsi bir dəqiqəlik sükutla yad edilib.
Tədbirdə Xocalı faciəsinin şahidləri, şəhidlərin doğmaları o dəhşətli gecədən danışıb, erməni vəhşiliklərindən söz açıblar.
Xankəndi şəhərində, Ağdərə və Xocalı rayonlarında Azərbaycan Respublikası Prezidentinin xüsusi nümayəndəliyinin əməkdaşı Səbuhi Qəhrəmanov Xocalı soyqırımının bəşər tarixində ən ağır faciələrdən biri olduğunu bildirib, soyqırımı ilə bağlı həqiqətlərin dünyaya çatdırılması sahəsində aparılan genişmiqyaslı işləri tədbir iştirakçılarının nəzərinə çatdırıb. 2023-cü il oktyabrın 15-də Prezident İlham Əliyevin Xocalı şəhərində Azərbaycanın Dövlət Bayrağını qaldırdığını, Xocalı faciəsi qurbanlarının qisasının döyüş meydanında alındığını vurğulayıb.
Anım mərasimində Xocalı soyqırımına həsr olunan videoçarx nümayiş etdirilib.
