Tbilisi, 26 mart, ARHD.AZ
Gürcüstanda azərbaycanlı tələbələrə dəstək məqsədilə “Qlobal Təhsil Assosiasiyası” fəaliyyətə başlayıb
Gürcüstanda soydaşlarımızın təşəbbüsü və təşkilatçılığı ilə “Qlobal Təhsil Assosiasiyası” (QTA) fəaliyyətə başlayıb.
ARHD.AZ xəbər verir ki, yeni təşkilat Azərbaycan Respublikasının Diasporla İş üzrə Dövlət Komitəsinin dəstəyi və layihələri çərçivəsində Tbilisidəki “Alyans” Gənclər Mərkəzində soydaşımız Raul Əliyev tərəfindən yaradılıb.
Assosiasiyanın təsisçisi və direktoru R.Əliyev bildirib ki, QTA artıq Gürcüstan Ədliyyə Nazirliyindən qeydiyyatdan keçib və bu gün hüquqi müstəvidə QHT kimi fəaliyyət göstərir. Assosiasiya Gürcüstanda təhsil alan tələbələrin təhsil sahəsində qarşılaşdıqları problemlərin həllinə, həmçinin onların ali məktəbdə oxuduqları dövrdə yeni mühitə adaptasiya olunmalarına dəstək verəcək.
R.Əliyev ARHD.AZ-a müsahibəsində deyib ki, Assosiasiyanın fəaliyyət istiqaməti tələbələrin və şagirdlərin akademik, həmçinin şəxsi inkişaflarına dəstək olmaqdır. Bizim əsas məqsədimiz tələbələrimizin təhsil yoluna bələdçilik etmək, onların inkişafını dəstəkləmək və uğurlarına yol açmaqdır. Bunun üçün də təhsillə bağlı məsləhətləşmələr təşkil edərək tələbələrə düzgün istiqamət veriləcək, təlimlər, seminarlar və konfranslar keçirilərək onların bilik və bacarıqlarının artırılmasına kömək göstəriləcək. Eyni zamanda, soydaşlarımızın təhsil və karyera ilə bağlı qarşılaşdıqları çətinliklərin praktiki həlli yolları təqdim ediləcək.
“Qlobal Təhsil Assosiasiyası” hazırda 7 tələbədən ibarətdir. Gənclərin üzləşə biləcəkləri bəzi psixoloji məqamlar da nəzərə alınıb və Assosiasiyaya peşəkar psixoloqlar dəvət olunub. Sentyabr ayında bu məqsədlə treninqlərin keçirilməsi planlaşdırılır.
