Bakı, 4 aprel, ARHD.AZ

Beynəlxalq Mina Xəbərdarlığı və Minatəmizləmə Fəaliyyətinə Yardım Günündə dünya bir daha mina təhlükəsinin yaratdığı dəhşətli nəticələri xatırlayır. Beynəlxalq ictimaiyyət fərdləri, icmaları və dövlətləri mina təhlükəsinə qarşı birləşməyə səsləyir. Ancaq bu problem bəzi ölkələr üçün sadəcə gündəlik xəbər başlığı, bəziləri üçün isə acı keçmişin izi ola bilər.

Bunu ARHD.AZ-a açıqlamasında Milli Məclisin deputatı Pərvanə Vəliyeva deyib.

O qeyd edib ki, mina terroru Azərbaycandan da yan keçməyib. “Belə ki, torpaqlarımızın 30 ilə yaxın işğalda saxlanılması zamanı vandallıq aktları törədilməsi ilə yanaşı, ərazilərimiz minalarla da çirkləndirilib. Bu müddət ərzində Ermənistan tərəfindən Azərbaycan torpaqlarına yüz minlərlə mina basdırılıb. Minalar məqsədli şəkildə mülki ərazilərə, kənd yollarına, su mənbələrinə, qəbiristanlıqlara, hətta məktəb və ibadətgahlara yaxın ərazilərdə yerləşdirilib.

30 il ərzində 3 min 400-dən çox azərbaycanlı mina qurbanı olub. Onlardan 359-u uşaq, 38-i isə qadındır. Bu rəqəmlər sadəcə statistika deyil, hər biri mina qurbanı ailələrin göz yaşına, minlərlə ömrün yarıda qalmasına şahidlik edib. Minatəmizləmə fəaliyyəti mürəkkəb və uzunmüddətli prosesdir. Dövlətimiz öz resurslarını səfərbər edərək səmərəliliyi artırmaq üçün ən son texnologiyalara investisiya ayırıb. Lakin atılan əhəmiyyətli addımlara baxmayaraq, minatəmizləmə üçün beynəlxalq dəstək hələ də yetərsizdir. Təəssüf ki, sonuncu belə hadisə bir neçə gün əvvəl Ağdamda baş verdi – bir mülki şəxs həyatını mina partlayışı nəticəsində itirdi”.

Mina problemini həll etmək üçün görülən işləri xatırladan deputat dövlətimizin bu prosesdə bütün imkanlarını səfərbər etdiyini vurğulayıb: “Azərbaycan Respublikasının Minatəmizləmə Agentliyi (ANAMA) və digər dövlət strukturları tərəfindən bu günə qədər 185 min 707 hektar sahə mina və partlayıcı sursatlardan təmizlənib, 181 min 148 partlayıcı vasitə zərərsizləşdirilib.

Ancaq Ağdamda baş verən partlayış sübut edir ki, görülən bütün bu işlərə baxmayaraq, minaların yaratdığı təhlükə hələ də proritetdir. Ermənistan tərəfindən təqdim edilən mina xəritələri qeyri-dəqiq, natamam və əksər hallarda isə tamamilə faydasızdır. Bu isə minatəmizləmə işlərini daha da çətinləşdirir, minatəmizləyənlərin həyatını riskə atır və daha çox vaxt və resurs tələb edir”.

O vurğulayıb ki, beynəlxalq təşkilatlar, dövlətlər və qeyri-hökumət qurumları mina terroruna daha çox diqqət ayırmalıdır. Bu gün Azərbaycana dəstək olmaq – sülhə, insan haqlarına və təhlükəsiz həyata dəstək olmaq deməkdir. Azərbaycan təkcə öz torpaqlarını yox, həm də insan ləyaqətini, dinc yaşamaq haqqını minalardan azad etməyə çalışır. Bu gün sadəcə mina təhlükəsinə qarşı maarifləndirmə günü deyil. Eyni zamanda, ədalətə, insanlığa və həmrəyliyə çağırış günüdür. Çünki minalar sülhə və sabitliyə qarşı görünməyən, lakin dağıdıcı bir müharibədir. Azərbaycan xalqı doğma yurdlarına qayıtmaq üçün yolların təhlükəsiz, torpaqların məhsuldar, uşaqların güvən içində oynadığı bir gələcəyə inanır.

“Bu gün dünyada 60-dan çox ölkə minaların təsiri altında yaşamağa davam edir və Azərbaycan həmin qlobal problemin həllində fəal iştirak edir. Azərbaycanın minatəmizləmə sahəsindəki səyləri, o cümlədən milli və beynəlxalq təşkilatlarla əməkdaşlığı, texnologiyanın tətbiqi və maarifləndirmə işləri genişləndirilməkdədir”, - deyə P.Vəliyeva fikrini yekunlaşdırıb.