Bakı, 23 aprel, ARHD.AZ

Türk Dövlətləri Təşkilatına (TDT) üzv ölkələrin Kosmik Agentliklərinin və aidiyyəti qurumlarının rəhbərlərinin 5-ci illik görüşünün Qazaxıstanda keçirilməsi nəzərdə tutulur.

ARHD.AZ xəbər verir ki, bu barədə Türk Dövlətləri Təşkilatının Baş katibi Kubanıçbek Ömüralıyev Bakıda keçirilən Türk Dövlətləri Təşkilatının Kosmik Agentliklərinin 4-cü görüşündə deyib.

“Gündəliyin digər məsələsi də növbəti iclasımızdır. Adətən əlifba sırası ilə həyata keçirilir. Bu il görüş Qazaxıstanda keçirilməli idi, lakin azərbaycanlı həmkarlarımız onun Bakıda keçirilməsini xahiş etdilər. Ümid edirik ki, 2026-cı ildə görüş Qazaxıstanda baş tutacaq”, - deyə Kubanıçbek Ömüralıyev bildirib.

K.Ömüralıyev onu da qeyd edib ki, gələn il oktyabr ayında Antalyada 77-ci Beynəlxalq Astronavtika Konqresi təşkil olunacaq.