Bakı, 3 aprel, ARHD.AZ
Azərbaycanın dünya birliyindəki nüfuzunun getdikcə artması artıq bütün sahələrdə özünü açıq şəkildə büruzə verir. Xüsusilə qeyd edilməlidir ki, Ermənistan üzərindəki tarixi Qələbədən sonra ölkəmizin reytinqi sürətlə yüksəlmişdir. İşğaldan azad edilmiş ərazilərdə aparılan yenidənqurma və bərpa işləri, həmçinin dünyanın bir sıra ölkələrinin bu işdə Azərbaycana dəstək verməsi bir daha “Qarabağ Azərbaycandır!” reallığının qəbul edilməsindən xəbər verir. Bu günlərdə Almaniya Federativ Respublikasının Prezidenti Frank-Valter Ştaynmayerin ölkəmizə səfəri və səfər çərçivəsində mətbuata verdiyi bəyanatda “Qarabağ Azərbaycandır, bu, rəsmi Berlinin birbaşa və aydın mövqeyidir” deməsi Azərbaycanın ərazi bütövlüyünün qəbul edilməsinin məntiqi nəticəsidir.
Bu fikirləri ARHD.AZ-a Demokratiya və İnsan Hüquqları Komitəsinin sədri, hüquq üzrə fəlsəfə doktoru Çingiz Qənizadə Azərbaycan Prezidenti İlham Əliyevin Almaniya Federativ Respublikasının Prezidenti Frank-Valter Ştaynmayerin bu günlərdə ölkəmizə səfəri zamanı mətbuata verdiyi bəyanatla əlaqədar açıqlamasında səsləndirib.
Hüquq müdafiəçisi əvvəlcə Almaniya ilə Azərbaycan arasındakı əməkdaşlıqdan söhbət açaraq deyib ki, iki ölkə arasında münasibətlərin əsası 1992-ci il yanvarın 12- də qoyulub. Həmin vaxt Almaniya Azərbaycanın müstəqilliyini tanımış və bir ay sonra iki ölkə arasında diplomatik münasibətlər qurulmuşdur. Hər iki ölkədə səfirliklər fəaliyyətə başladıqdan sonra Azərbaycan və Almaniya arasında davamlı siyasi dialoq, iqtisadiyyat və humanitar sahələrində geniş əməkdaşlıq həyata keçirilmişdir. Dövlət başçılarının qarşılıqlı səfərləri bu əməkdaşlığı daha da möhkəmləndirdi. Onu da qeyd edək ki, bu müddət ərzində Azərbaycan Prezidenti Almaniyaya 17 rəsmi və işgüzar səfər həyata keçirmişdir.
Ç.Qənizadə daha sonra qeyd edib ki, bu əməkdaşlıq hökumət və parlament başçılarının qarşılıqlı səfərləri zamanı daha da inkişaf etmişdir. İki ölkə arasında indiyə qədər 77 sənədin imzalanması ikitərəfli əməkdaşlığın inkişafından xəbər verir. Azərbaycan-Almaniya parlamentlərarası əlaqələr üzrə işçi qrupu, Almaniya Bundestaqında isə Azərbaycanı da əhatə edən Almaniya-Cənubi Qafqaz parlament qrupu fəaliyyət göstərir. Almaniya Prezidentinin bu səfəri iki ölkə arasında münasibətlərin daha da yaxşılaşacağından xəbər verir. Bunu Azərbaycan Prezidenti İlham Əliyev mətbuata verdiyi bəyanatında da diqqətə çatdırdı.
Tanınmış hüquqşünas dövlət başçımızın çıxışındakı bəzi məqamları xüsusilə vurğulayıb: “Azərbaycan Prezidenti əminliklə bildirdi ki, bu səfər iki ölkə arasındakı əlaqələrə yeni müsbət təkan verəcək. Dövlətimizin başçısı diqqətə çatdırdı ki, həm təkbətək görüşdə, həm də nümayəndə heyətlərinin iştirakı ilə aparılan danışıqlarda Almaniya-Azərbaycan əlaqələrinin gələcək inkişafı müzakirə edilmişdir. İqtisadi sahədə əldə edilmiş nəticələr barəsində də məlumat verildi. Qeyd edildi ki, bu ilin yanvar-fevral aylarında iki ölkə arasında ticarət dövriyyəsi təxminən üç dəfə artıb. Bunun əsas səbəbi Azərbaycandan Almaniyaya ixrac edilən xam neftin həcminin artması olmuşdur”. Ç.Qənizadə sözünə davam edərək deyib ki, bərpaolunan enerji sahəsində Almaniya şirkətlərinin çox böyük təcrübəsi var. Bu sahədə Azərbaycanın da çox böyük proqramı, planları var.
Hüquq müdafiəçisi Prezident İlham Əliyevin Azərbaycanın COP29 beynəlxalq iqlim konfransına uğurlu ev sahibliyindən də söhbət açdığını bildirib. COP29-da 197 ölkəni təmsil edən 77 mindən çox iştirakçının qeydiyyatdan keçməsi bu konfransa dünyada böyük maraq göstərilməsindən və uğurlu nəticələrlə zəngin olmasından xəbər verir: “Konfransda iştirak etməyən yeganə ölkə Ermənistan olmuşdur. Bu da, təbii olaraq, təəssüf hissi doğurur. Çünki xüsusilə indiki şəraitdə - Azərbaycanla Ermənistan arasında normallaşma prosesinin uğurla getdiyi bir zamanda Ermənistan tərəfinin bu beynəlxalq konfransı boykot etməsi başadüşülən deyildi. İki ölkə prezidentləri arasında keçirilən görüşdə bu məsələ də müzakirə olundu və Azərbaycanın mövqeyi Almaniya tərəfinə çatdırıldı. Bununla yanaşı, ölkəmizin 30 il ərzində erməni işğalından əziyyət çəkdiyi barədə də məlumat verildi. Qeyd edildi ki, bir milyondan artıq azərbaycanlı erməni aqressiyasına görə evsiz-eşiksiz qalmışdır və torpaqlarımızın təxminən 20 faizi işğal altına düşmüşdür. Əfsuslar olsun ki, beynəlxalq təşkilatlar bu məsələ ilə bağlı ciddi addım atmamışlar. Azərbaycan bu münaqişəni və beynəlxalq hüququ özü döyüş meydanında və siyasi müstəvidə həll etmişdir. Məhz bu tarixi Zəfərimiz sülh danışıqlarına yol açmışdır”.
Görüşdə digər mühüm əhəmiyyətli məsələlərin də müzakirə olunduğunu bildirən Ç.Qənizadə bu səfərin çox müsbət nəticələrinin olacağına, səfərin yekunlarının ölkələrimizi bir-birinə daha yaxın edəcəyinə əminliyini ifadə edib.
