Bakı, 4 aprel, ARHD.AZ

İqtisadiyyat naziri Mikayıl Cabbarov Səudiyyə Ərəbistanı Krallığının “ACWA Power” şirkətinin baş icraçı direktoru Marko Arçelli ilə görüşüb.

Nazirlikdən ARHD.AZ-a bildirilib ki, görüşdə “ACWA Power”in Azərbaycanda həyata keçirdiyi layihələrin əhəmiyyəti vurğulanıb. Bu layihələrin ölkənin enerji resurslarının diversifikasiyasına və ekoloji dayanıqlılığının artırılmasına xidmət etdiyi qeyd edilib. Təcrübə mübadiləsinin və şirkətin innovativ yanaşmalarının enerji sahəsində daha effektiv, təmiz və iqtisadi baxımdan sərfəli həllərin tətbiqinə imkan yaratdığı qeyd olunub.

Şirkət tərəfindən enerjidən səmərəli istifadəni artırmaq, su resurslarından rasional istifadəni təmin etmək istiqamətində həyata keçirilən layihələr barədə məlumat verilib. Tərəflər əməkdaşlığın gündəliyində olan məsələlər, Azərbaycanda dəniz suyunun duzsuzlaşdırılması layihəsi və potensial birgə təşəbbüslər barədə fikir mübadiləsi aparıblar.

Qeyd edək ki, Səudiyyə Ərəbistanının enerji, xüsusilə bərpaolunan enerji sektorunda aparıcı şirkətlərindən olan “ACWA Power” şirkəti dünyanın bir sıra ölkələrində bərpaolunan enerji mənbələrindən elektrik enerjisi istehsalı, duzsuzlaşdırılmış su istehsalı üzrə layihələrdə developer, investor və operator kimi iştirak edir.