Bakı, 19 mart, ARHD.AZ
Özbəkistanın paytaxtı Daşkənd şəhərində Türk Dövlətləri Qiymətləndiricilərinin IV Konqresi keçirilib.
Azərbaycan Qiymətləndiricilər Cəmiyyətindən (AQC) AZƏRTAC-a bildirilib ki, konqresdə Türk Dövlətləri Qiymətləndiricilər Birlikləri Şurasına (CAATS) üzv olan 7 ölkənin qiymətləndirmə təşkilatlarının rəhbər şəxsləri, o cümlədən CAATS prezidenti və Azərbaycan Qiymətləndiricilər Cəmiyyətinin sədri Vüqar Orucun rəhbərlik etdiyi nümayəndə heyəti iştirak ediblər. Eyni zamanda, qonaq qismində CAATS üzvü olmayan Gürcüstan və Azərbaycan Qiymətləndiricilər Palatasının rəhbərliyi və üzvləri tədbirə qatılıblar.
Özbəkistan Qiymətləndiricilər Cəmiyyətinin sədri Nargiza Mirzarahimova konqresin işinə uğurlar arzulayıb. Daha sonra CAATS prezidenti, AQC sədri Vüqar Oruc çıxış edib.
V.Oruc CAATS-ın yarandığı gündən etibarən atılan addımlar barədə iştirakçılarla fikirlərini bölüşüb, şuranın fəaliyyəti nəticəsində türk dövlətləri qiymətləndiriciləri arasında əməkdaşlığın dərinləşdiyini vurğulayıb. O, CAATS-ın Azərbaycanda qeydiyyatdan keçirilməsi ilə bağlı Ədliyyə Nazirliyinə müraciət edildiyini diqqətə çatdırıb. Qeyd edib ki, Azərbaycanda qeydiyyatdan keçirildikdən sonra təşkilatın fəaliyyəti yeni inkişaf mərhələsinə qədəm qoyacaq.
AQC sədri CAATS-ın gələcək hədəfləri sırasında türk dövlətlərinin vahid sertifikatlaşdırma prosesinin aparılması, ortaq qiymətləndirmə standartlarının yaradılması, Macarıstanın da CAATS-a daxil olması istiqamətində addımların atılacağını xüsusi vurğulayıb. Eyni zamanda, Azərbaycanda qiymətləndirmə sektorunda baş verən yeniliklər, “Qiymətləndirmə fəaliyyəti haqqında” Qanunun qəbul edilməsi, Azərbaycan Qiymətləndiricilər Palatasının yaradılması ilə bağlı konqres iştirakçılarını məlumatlandırıb.
Konqresdə çıxış edən AQC sədrinin müavini İbrahim Quliyev məruzəsində Azərbaycanda qiymətləndirmə fəaliyyətinin formalaşması, inkişaf mərhələləri və bu istiqamətdə AQC-nin atdığı addımlardan danışıb. İ.Quliyev 2022-2024-cü illərin AQC-nin təşəbbüsləri ilə Azərbaycanda qiymətləndirmə sektoru üçün hədəfə çatma və institusional inkişaf mərhələsi olduğunu diqqətə çatdırıb.
Konqresdə türk dövlətləri qiymətləndiricilərini maraqlandıran məsələlər ətrafında müzakirələr aparılıb, CAATS-a üzv olan dövlətlərin qiymətləndirmə təşkilatlarının rəhbər şəxslərinin məruzələri dinlənib. Çıxışlar zamanı müxtəlif qiymətləndirmə istiqamətləri, o cümlədən mineralların və təbii yataqların qiymətləndirilməsi, həmçinin otellərin qiymətləndirilməsi üzrə maraqlı slaydlar təqdim olunub.
Konqres çərçivəsində türk dövlətləri qiymətləndiriciləri arasında qarşılıqlı əlaqələrin inkişafı və CAATS-ın yaradılması istiqamətində müstəsna xidmətlərinə görə, Özbəkistan Qiymətləndiricilər Cəmiyyətinin sədri N.Mirzəmahmudova tərəfindən CAATS prezidenti, AQC sədri V.Oruca mükafat təqdim olunub.
