Bakı, 3 oktyabr, ARHD.AZ
Ukrayna XIN: ABŞ-da şatdaun silah tədarükünə təsir etməyib
ABŞ hökumətinin fəaliyyətini dayandırması (şatdaun) Ukraynaya Amerika silahlarının çatdırılmasını gecikdirməyib, eləcə də “dron sazişi” üzrə danışıqları pozmayıb.
ARHD.AZ xəbər verir ki, bunu Ukrayna Xarici İşlər Nazirliyinin sözçüsü Georgi Tixi bildirib.
Onun sözlərinə görə, iki ölkə arasında danışıqlar planlaşdırıldığı kimi gedir və silahlar göndərilməkdədir.
Bildirilir ki, oktyabrın 1-də Ukraynanın danışıqlar aparan nümayəndə heyəti “dron sazişi”ni müzakirə etmək üçün Vaşinqtona gəlib. Müqaviləyə əsasən, ABŞ və Ukrayna 50 milyard dollar dəyərində pilotsuz təyyarələrin birgə istehsalını planlaşdırır. Bəzi Qərb mediası planlaşdırılan görüşlərin şatdaun səbəbindən ləğv edildiyini yazıb. Amerika mediası isə şatdaunun Amerika silahlarının Kiyevə çatdırılmasında gecikmələrə səbəb ola biləcəyi barədə xəbərlər yayıb.
