Haaqa, 1 aprel, ARHD.AZ

Avropada yaşayan azərbaycanlı kimi məqsədimiz ölkəmizə qarşı ədalətsiz qətnamələrin ləğv olunmasını, Xocalıda, eləcə də digər Azərbaycan ərazilərində ermənilərin azərbaycanlılara qarşı törətdiyi soyqırımı aktlarını dünyaya çatdırmaq və bununla bağlı ədalətə nail olmaqdır. Mən də gənc və fəal diaspor üzvü kimi belə etiraz nümayişlərinin təşkilini vacib hesab edir və onlara qatılıram.

Bu fikirləri ARHD.AZ-a açıqlamasında Haaqada “Sülh və Ədalət Sarayı”nın qarşısında ədalət çağırışı ilə keçirilən etiraz aksiyasının iştirakçısı və Xocalı faciəsində çox sayda yaxınını itirmiş Ayxan Sadıxov deyib.

“Azərbaycan heç vaxt müharibə istəməyib, həmişə sülh istəyib. Bu gün səsləndirdiyimiz məsələlərlə bağlı Ermənistan hökumətinə rəsmi məlumat göndərərək, onların razılaşmasını və sülh müqaviləsinin imzalanmasını tələb etmişik. Vaxtilə Ermənistan Azərbaycanın tələblərinə məhəl qoymadı. Sonda Azərbaycan öz torpaqlarını müharibə ilə azad etməyə məcbur oldu.

Bu gün Niderlanddakı Ədalət Məhkəməsi qarşısında toplaşaraq, Avropada ölkəmiz əleyhinə qəbul olunmuş qərarların ləğvini tələb edirik. Onlar Azərbaycanda hərbi cinayətlər törətməkdə təqsirləndirilən şəxslərin azad edilməsini istəyirlər. Bu nümayişlə onların diqqətinə çatdırırıq ki, ölkəmizdə məhkəməsi keçirilən ermənilər heç biri mülki şəxs və ya sıravi əsgər deyil. Onlar Birinci və İkinci Qarabağ müharibələrinin təşkilatçılarıdır. Onlar layiq olduqları cəzanı almalıdırlar”,- deyə A.Sadıxov vurğulayıb.