Tovuz, 28 mart, ARHD.AZ
Tovuz şəhər stadionunda yeni inşa edilmiş əsas korpus binasının açılışı olub.
ARHD.AZ-ın bölgə müxbiri xəbər verir ki, mərasimdə AFFA-nın baş katibi Cahangir Fərəcullayev, baş katibin müavini Kamran Vəliyev, PFL-in texniki-idman direktoru Elgiz Abbasov, FİF-in icraçı direktoru Tural Piriyev, “Turan Tovuz” PFK-nın idarə heyətinin sədri Ehtiram Quliyev, klubun idarə heyəti üzvləri, futbol ictimaiyyəti və media nümayəndələri iştirak ediblər.
Ümumi ərazisi 3 min kvadratmetrdən çox olan binanın təməli 2023-cü ilin iyul ayında atılıb. Zirzəmi ilə birlikdə 4 mərtəbədən ibarət bina 30 otaqdan ibarətdir. Fitnes zalı, toplantı, həkim və fizioterapiya otaqları ilə yanaşı məşqçilər, həkimlər və inzibati işçilər üçün ayrıca otaqlar ayrılıb. Burada futbolçuların asudə vaxtlarını maraqlı keçirmələri üçün stolüstü tennis, bilyard, video oyun avadanlıqları ilə təmin olunmuş böyük istirahət guşəsi yaradılıb. Bütün otaqlar ən müasir və zəruri avadanlıqlarla təchiz edilib.
Yeni bina ilə birlikdə 24 otaqdan ibarət olan 2 korpuslu akademiya binası bütövlükdə “Turan Tovuz” Futbol Akademiyasının ixtiyarına veriləcək.
