Bakı, 3 aprel, ARHD.AZ

Antiterror əməliyyatından sonra David İşxanyanın Xankəndidəki hotelində silah-sursat aşkarlanmışdı 

Azərbaycanın dövlət suverenliyi təmin olunduqdan sonra 2023-cü ilin oktyabrında təqsirləndirilən şəxs David İxşanyana məxsus “Park” adlı hoteldə silah-sursat və rabitə vasitələri aşkarlanıb.

ARHD.AZ xəbər verir ki, aprelin 3-də Bakı Hərbi Məhkəməsində davam etdirilən məhkəmə prosesində dövlət ittihamçısı təqsirləndirilən şəxsə həmin silah-sursatla bağlı sual ünvanlayıb.

Təqsirləndirilən şəxs rabitə vasitələrinin hotelə məxsus olduğunu deyərək silah-sursatla bağlı məsələdə isə digər erməni sakinləri günahlandıraraq deyib: “Mənim fikrimcə, o hadisədən bir həftə əvvəl Ağdərədən gəlmiş sakinlər o hoteldə məskunlaşmışdı. Ehtimal ki, (silah-sursatı – red.) onlar qoyublar”.

Qeyd edək ki, Ermənistanın hərbi təcavüzü nəticəsində sülh və insanlıq əleyhinə cinayətlər, müharibə cinayətləri, o cümlədən təcavüzkar müharibənin hazırlanması və aparılması, soyqırımı, müharibə qanunlarını və qaydalarını pozma, habelə terrorçuluq, terrorçuluğu maliyyələşdirmə, hakimiyyəti zorla ələ keçirmə, onu zorla saxlama və digər çoxsaylı cinayətlər törətməkdə təqsirləndirilən Ermənistan Respublikasının vətəndaşlarının məhkəməsi davam etdirilir.