Bakı, 30 mart, ARHD.AZ
"AGF Trophy"nin qalibi: Qızıl medal qazanacağıma inanırdım
"Özümdən bu nəticəni gözləyirdim. Səhvlərim olsa da, fəxri kürsünün ən yüksək pilləsində yer aldığım üçün xoşbəxtəm".
Bu sözləri ARHD.AZ-a açıqlamasında Bakıda keçirilən "AGF Trophy" beynəlxalq turnirində qızıl medal qazanan Azərbaycanın bədii gimnastı Azadə Atakişiyeva deyib. Halqa proqramında bütün rəqiblərini qabaqlayan idmançı azarkeşlərin dəstəyini hiss etdiyini söyləyib: "Dəstəklərini əsirgəməyənlərə minnətdaram. Burada güclü idmançılar yarışır. Amma mənim ən böyük rəqibimin elə özüməm. Ona görə də qızıl medal qazanacağıma inanırdım".
O, növbəti hədəflərindən bəhs edib: "Əsas məqsədim gənclər arasında dünya çempionatında iştirak etmək və orada ölkəmi layiqincə təmsil etməkdir".
A.Atakişiyeva mükafatını məşqçi və xoreoqraflarına həsr etdiyini deyib.
Qeyd edək ki, turnirə bu gün yekun vurulacaq.
