Bakı, 29 iyul, arhd.az
Fələstin Muxtariyyətinin Baş naziri: HƏMAS silahları yerə qoymalıdır
Fələstinin Muxtariyyətinin Baş naziri Məhəmməd Mustafa bildirib ki, HƏMAS döyüşdən zərər çəkmiş ərazidə təhlükəsizliyi bərpa etmək üçün tərk-silah edilməli və Qəzzaya nəzarəti Fələstin Muxtariyyətinə təhvil verməlidir.
ARHD.AZ “Əl Ərəbiyə” telekanalına istinadla xəbər verir ki, M.Mustafa Nyu-Yorkda keçirilən Birləşmiş Millətlər Təşkilatının İsrail və Fələstinin “iki dövlət” həllinə dair konfransdakı çıxışında bildirib: “İsrail Qəzza zolağından tamamilə çıxmalı, HƏMAS bu zolağa nəzarəti azad etməli və silahlarını Fələstin Muxtariyyətinə təhvil verməlidir”.
Bazar ertəsi Fransanın baş diplomatı Paris və Ər-Riyadın həmsədrlik etdiyi konfransda deyib ki, israillilər və fələstinlilər arasında iki dövlət həllinə alternativ yoxdur. İsrail və ABŞ tərəfindən boykot edilən konfransdan bir neçə gün əvvəl Fransa prezidenti Emmanuel Makron sentyabrda Fələstin dövlətçiliyini rəsmən tanıyacağını bəyan edərək İsrail və Vaşinqtonun kəskin etirazına səbəb olub.
Fələstinin Baş naziri bildirib ki, bütün dövlətlər məhz indi hərəkətə keçməlidir. O, Fələstin dövlətçiliyinin qurulmasına kömək etmək üçün beynəlxalq dəstəyə çağırıb.
Amma Birləşmiş Millətlər Təşkilatının Baş katibi Antonio Quterreş iclasda bildirib ki, “iki dövlət həlli əvvəlkindən daha uzaqdır”.
AFP-nin məlumat bazasına görə, BMT-yə üzv olan 193 ölkədən azı 142-si hazırda 1988-ci ildə sürgündə olan Fələstin rəhbərliyi tərəfindən elan edilmiş Fələstin dövlətini tanıyır.
1947-ci ildə Baş Assambleyanın təsdiq etdiyi qətnamə ilə Birləşmiş Millətlər Təşkilatı o vaxt Britaniya mandatı altında olan Fələstinin yəhudi və ərəb dövlətlərinə bölünməsinə qərar verib. İsrail Dövləti isə 1948-ci ildə elan edilib. Artıq onilliklərdir ki, BMT üzvlərinin əksəriyyəti İsrail-Fələstin probleminin bu yolla həllini dəstəkləyir.
