Astana, 10 fevral, ARHD.AZ
Aral dənizinin şimalında su balansı bərpa olunur
2024-cü ilin oktyabrından 2025-ci ilin yanvarınadək Aral dənizinin şimal hissəsinə 1 milyard kubmetr su buraxılıb ki, bu da nəzərdə tutulan həcmi 100 milyon kubmetr üstələyib.
ARHD.AZ Qazaxıstan Respublikası Su Təsərrüfatı və İrriqasiya Nazirliyinin mətbuat xidmətinə istinadla xəbər verir ki, Mərkəzi Asiya ölkələri ilə əldə edilmiş razılaşmalar sayəsində 2025-ci ilin mart ayının sonunadək Aral dənizinin şimalına ümumilikdə 1,6 milyard kubmetr su axıdılacaq.
Bu gün Aral dənizinin şimal hissəsində suyun ümumi həcmi 22,1 milyard kubmetrdir. 2022-ci ilin əvvəlində bu rəqəm 18,9 milyard kubmetr təşkil edib. Dənizdəki suyun həcminin 2025-ci ilin sonuna kimi 23,4 milyard kubmetrə qədər artacağı gözlənilir.
Şimali Aral dənizinin sahəsi də artmaqda davam edir və hazırda 3065 kvadrat kilometrə çatıb. Bu, 2022-ci ilin əvvəli ilə müqayisədə 111 kvadrat kilometr çoxdur.
Aral dənizinin şimal hissəsinin həcminin və sahəsinin artması suyun minerallaşmasını azaltmağa və 22 balıq növünün populyasiyasını bərpa etməyə imkan verib. İllik balıq ovu həcmi isə 8 min tona çatıb.
